గర్భధారణలో ఉన్న మహిళలకు సాధారణంగా వచ్చే ఇబ్బందులు

గర్భధారణలో ఉన్న మహిళలకు సాధారణంగా వచ్చే ఇబ్బందులు – సురక్ష హాస్పిటల్ వైద్యుల సూచనలు.

గర్భధారణ ప్రతి మహిళ జీవితంలో ఒక అద్భుతమైన ప్రయాణం. ఈ కాలంలో శరీరంలో అనేక మార్పులు జరుగుతాయి. ఆ మార్పుల వల్ల కొన్ని చిన్న చిన్న ఇబ్బందులు రావడం సహజం. ఇవి ఎక్కువగా హార్మోన్ మార్పులు మరియు బిడ్డ పెరుగుదల కారణంగా వస్తాయి. ఆందోళన చెందాల్సిన అవసరం లేదు — సరైన జాగ్రత్తలు తీసుకుంటే ఈ సమస్యలు సులభంగా తగ్గిపోతాయి.

ఇప్పుడు గర్భధారణలో ఉన్న మహిళలకు సాధారణంగా వచ్చే కొన్ని సమస్యలు, వాటి కారణాలు మరియు పరిష్కారాలను తెలుసుకుందాం.

1: వేవిళ్లు (వికారంగా ఉండటం / వాంతులు)

దీన్ని ‘మార్నింగ్ సిక్‌నెస్’ అంటారు గానీ, ఇది పొద్దున్నే రావాలని ఏమీ లేదు. పగలైనా, రాత్రైనా ఎప్పుడైనా రావచ్చు. కొన్ని వాసనలు, కొన్ని రుచులు పడకపోతే ఇలా వికారంగా అనిపిస్తుంది. గర్భం వచ్చిన మొదటి నెల, రెండు నెలల్లో ఇది ఎక్కువగా ఉంటుంది. ఇది గర్భవతులలో చాలా సాధారణం, దీనివల్ల మీ బిడ్డకు ఎలాంటి ప్రమాదం ఉండదు.

వేవిళ్ళు ఎందుకు వస్తాయి?

గర్భం రాగానే మన శరీరంలో $h CG$ అనే హార్మోన్ బాగా పెరుగుతుంది. దాని వల్లే ఈ వికారం, వాంతులు వస్తాయని డాక్టర్లు అంటారు. దాంతో పాటు, ఈస్ట్రోజెన్, ప్రొజెస్టెరాన్ హార్మోన్ల వల్ల కూడా జీర్ణశక్తి కొంచెం నెమ్మదించి, తిన్నది సరిగ్గా అరగనట్లు అనిపిస్తుంది.

తగ్గించుకోవడానికి చిట్కాలు:

మసాలా, కారం, నూనె పదార్థాలను తగ్గించండి.
రాత్రికి ఖాళీ కడుపుతో అస్సలు పడుకోవద్దు. పడుకునే ముందు ప్రొటీన్లు ఉండే పాలు, పండ్లు లాంటివి తినండి.
భోజనం చేసేటప్పుడు నీళ్ళు ఎక్కువ తాగకండి. భోజనానికి, భోజనానికి మధ్యలో కొంచెం కొంచెంగా తాగండి.
మీరు వేసుకునే ఐరన్ బిళ్ళల వల్ల కూడా వికారంగా ఉండొచ్చు. ఒకసారి మీ డాక్టర్‌తో మాట్లాడితే, వాళ్ళు వేరేవి సూచిస్తారు.
నెమ్మదిగా లేచే అలవాటు చేసుకోండి మరియు ఒకేసారి ఎక్కువ తినకుండా రోజంతా చిన్న చిన్న మోతాదుల్లో తినండి.

2: నడుము నొప్పి

గర్భధారణలో ఉన్న మహిళల్లో దాదాపు 50% మందికి నడుము నొప్పి అనుభవమవుతుంది. ఇది ఆరో నెల తర్వాత ఎక్కువగా కనిపిస్తుంది మరియు కొంతమందిలో ప్రసవం తర్వాత కూడా కొన్ని వారాలు కొనసాగుతుంది.

కారణం:
బిడ్డ పెరుగుతున్న కొద్దీ గర్భాశయం విస్తరిస్తుంది. దీని వల్ల వెన్నుపూసపై ఒత్తిడి పెరిగి నడుము నొప్పి వస్తుంది.

తగ్గించుకోవడానికి చిట్కాలు:

సాధారణ వ్యాయామాలు చేయండి. వెన్నును నిటారుగా ఉంచే అలవాటు చేసుకోండి.
కూర్చునేప్పుడు నడుము వెనుక చిన్న దిండు పెట్టుకోండి.
వేడి నీళ్ళ కాపడం పెట్టుకోండి లేదా ఐస్‌తో నెమ్మదిగా మసాజ్ చేయండి. నొప్పి నుండి మంచి ఉపశమనం లభిస్తుంది.

సమస్య 3: ఛాతీలో మంట / గ్యాస్ / అజీర్ణం

గర్భంతో ఉన్నప్పుడు ఛాతీలో మంటగా అనిపించడం, త్రేన్పులు రావడం, గ్యాస్ పట్టేయడం వంటివి మామూలే.

ఈ సమస్య ఎందుకు వస్తుంది? ఈ టైంలో హార్మోన్ల వల్ల మనం తిన్నది సరిగ్గా, తొందరగా అరగదు. దానివల్ల కడుపులో యాసిడ్ పైకి తన్నినట్లు అనిపించి ఛాతీలో మంటగా ఉంటుంది.

తగ్గించుకోవడానికి చిట్కాలు:

మసాలాలు, కారం, నూనె వస్తువులు బాగా తగ్గించండి. ఒకేసారి ఎక్కువ తినకుండా, కొద్దికొద్దిగా తినండి.
రాత్రి పూట మసాలా భోజనాలు, కూల్ డ్రింక్స్ లాంటివి అస్సలు వద్దు.
భోజనం చేసిన వెంటనే పడుకోకండి, కనీసం 1 గంట గ్యాప్ ఇవ్వండి.
కాఫీ, కోల్డ్ డ్రింక్స్ వంటివి తగ్గించండి.

ముఖ్య గమనిక:

ఛాతీలో మంట లేదా గ్యాస్ సమస్య మరీ ఎక్కువగా ఉంటే, మీ సొంతంగా మందుల షాపులో బిళ్ళలు తీసుకుని వేసుకోకండి.
కొన్ని మందులు గర్భధారణ సమయంలో తీసుకుంటే, కడుపులో ఉన్న బిడ్డకు హానికరం కావచ్చు.
అందువల్ల ఎప్పుడూ డాక్టర్ సూచనతో మాత్రమే మందులు వాడండి.

సురక్ష హాస్పిటల్‌లో మా నిపుణ వైద్యులు, మీ ఆరోగ్యానికి మరియు బిడ్డ భద్రతకు పూర్తిగా సురక్షితమైన మందులు సూచిస్తారు.

💡సురక్ష మల్టీ స్పెషాలిటీ హాస్పిటల్, జమ్మికుంట

ఏ చిన్న సమస్య ఉన్నా కూడా నిర్భయంగా మమ్మల్ని సంప్రదించండి – మేము ఎల్లప్పుడూ మీతో ఉన్నాం.